Normalízase a contratación de varios servizos de televisión baixo demanda

Plataformas audiovisuais de pagamento contratadas nos fogares españois con acceso á Rede

A Comisión Nacional dos Mercados e a Competencia (CNMC) revelou que seis de cada dez fogares con acceso a Internet en España contrataron máis dunha plataforma de contidos audiovisuais en liña de pagamento no último trimestre de 2024. Segundo o Panel de Fogares da CNMC, o 63,3 % dos usuarios optou por combinar varios servizos, mentres que só o 36,7 % empregaba un único.
Entre as plataformas máis populares, Netflix encabezou a listaxe con presenza en máis do 40 % dos fogares, seguida de Amazon Prime Video (21,4 %) e Movistar Plus+ (16,7 %). Ademais, máis do 60 % dos usuarios contratou directamente coa plataforma, aínda que un 41,3 % accedeu mediante paquetes do seu operador de internet e un 13,2 % usou contas compartidas.
O estudo tamén evidencia unha clara diferenza xeracional: os menores de 24 anos preferiron servizos como YouTube ou TikTok, mentres que os maiores de 50 anos consumiron maioritariamente televisión en aberto. A poboación entre 25 e 49 anos repartiu o seu consumo entre a TDT e as plataformas baixo demanda.
A análise baséase en máis de 5.400 fogares e 9.100 individuos enquisados pola CNMC durante o cuarto trimestre de 2024, dentro do seu Panel de Fogares, unha ferramenta que permite coñecer os hábitos de consumo dos cidadáns en distintos sectores.