Nokia Treasure Tag: tecnoloxía para axudarnos a non extraviar os obxectos de valor
mércores, 19 de febreiro do 2014
Nokia está
a presentar estes días o seu servizo Treasure Tag e faino
salientando o potencial amañador de problemas deste servizo. Máis
polo miúdo, destaca a súa facultade para solucionarnos ensarillados
como ter saído da nosa casa sen a carteira ou o móbil e sen a
posibilidade inmediata de recuar sobre os nosos pasos. Nokia Treasure
Tag, sinala o fabricante, é un aparello que podemos carretar
enganchado ás nosas chaves ou bolso ou carteira, con conexión
directa ao smartphone Nokia Lumia, que estará en disposición
de achegarnos un aviso en canto estes elementos non estean xuntos.
Nokia Treasure Tag ten
formato de chaveiro e apenas mide 30 x 30 x 10 mm. O seu peso é de
13 gramos e, en palabras do fabricante, “resulta un accesorio
pequeno e moi útil que todo o mundo debería ter”. Para conectalo
podemos usar NFC cun toque no smartphone compatíbel, ou
buscar o Nokia Treasure Tag na configuración bluetooth do
noso terminal. A aplicación Nokia Treasure Tag, dispoñíbel
na tenda Windows Phone para o Nokia Lumia, ten “unha doada
configuración” e achega de xeito simple “todo o control do seu
funcionamento”, explica a compañía. Nokia Treasure Tag estará
no mercado en catro cores diferentes -cian, amarelo, branco e negro-
e cun prezo recomendado de 24,90 euros. En breve haberá aplicacións
de terceiros que darán soporte ao Nokia Treasure Tag en dispositivos
Android ou iOS.
{{}}