Nace un servizo galego para xerar e compartir mapas en liña
luns, 12 de abril do 2010
A
utilidade das redes sociais, cuestionada por unha parte considerable da
poboación internauta do noso país que as ve tan só como unha ferramenta para
atopar antigos amigos e manter o contacto con eles en liña, vai pasar a ter
outra valoración máis positiva cando a xente coñeza o traballo da empresa
galega SIXTEMA.
Esta entidade, con sede en
Santiago de Compostela que foi cualificada como I.E.B.T. pola Xunta no ano
2005, está a desenvolver unha rede social para compartir cartografía, que só no
seu primeiro mes de funcionamento congregou a máis de 400 usuarios. ikiMap, que así
se chama a ferramenta, achega como novidade a posibilidade de crear os mapas
que se desexen coa información dispoñible, o que resulta de grande utilidade
para todos os afeccionados e profesionais da cartografía e para calquera
usuario en xeral.
A aplicación, que se pode usar
libremente previo rexistro de balde na web, é sinxela e doada de manexar e dela
fixéronse eco diversos boletíns especializados en software e servizo web, como genbeta.com, que destaca ikiMap como unha “idea xenial” e un “servizo moi completo que permite compartir información relevante
que pode visualizarse nunhas coordenadas xeográficas, é dicir, desenvolver máis
alá do simple mapa que ofrece Google Maps, achegar valor e colaborar
conxuntamente na nube para facer evolucionar o servizo”.
Igual que se se tratara dunha rede
social tradicional como pode ser Facebook ou Tuenti, a ikiMap permite deixar
comentarios, puntuar os mapas e mesmo descargalos ou compartilos con outros
usuarios da Rede.
Segundo destacan os seus
promotores, as posibilidades de ikiMap “son
moi grandes e abertas”, e dado o carácter social do proxecto, son os
propios usuarios os que definen o seu rumbo.
Porén a principal utilidade desta
aplicación consiste en que ás ferramentas existentes pódenselle ir incorporando
outras novas que permitan mellorar as funcionalidades da rede social e
proporcionarlle aos usuarios máis experimentados unha boa plataforma para a
xestión e publicación de cartografía.