Mophie comercializa unha funda con batería para o Samsung GALAXY S4

martes, 27 de agosto do 2013 Marcus Fernández

Para ampliar a autonomía de smartphones como o iPhone 5 existen fundas que integran unha batería, e agora tamén temos un accesorio semellante para o Samsung GALAXY S4, que chega da man de Mophie e que por 99,95 dólares (74,94 euros) combina unha funda ríxida que protexe o móbil das agresións do seu uso diario e unha batería de 2.300 mAh, de xeito que incrementa nun 80% a autonomía do teléfono insignia de Samsung.
Esta funda con batería coñecida como juice pack véndese en cor branca e negra, pesa 130 gramos e ten un grosor de 17 milímetros. Na parte traseira da funda podemos ver catro luces LED que indican o nivel de carga da batería externa. Cómpre destacar que este tipo de dispositivos non resultan populares nos móbiles como o GALAXY S4, pois a súa batería é extraíble (o que facilita que o usuario poida cambiar de batería cando se esgota a actual) pero ao servir tamén como protección do terminal, pode resultar cómodo en situacións determinadas nas que non queremos cargar varios accesorios (xa que unha vez posta a funda compórtase como unha unidade co teléfono).

A funda ten un indicador de carga na súa parte traseira

PUBLICIDADE