Modernización incentiva a creación de contidos educativos dixitais con premios en metálico
xoves, 28 de abril do 2011
Din os seus
promotores que o Proxecto ABALAR ten a súa orixe na palabra celta “abal”, que significa mazá, a froita da
sabedoría, e que no termo galego úsase ABALAR
para transmitir a mensaxe de promover e facilitar o movemento, o cambio e a
transformación na educación.
Se ben é certo
que hai unha necesidade de cambio na metodoloxía de ensino tradicional, que
agora debe botar man de todas cantas ferramentas tecnolóxicas existen para non
quedar obsoleta, tamén é certo que é labor de todos facer que o proxecto teña éxito
e que as TIC se integren finalmente en tódalas escolas galegas.
Porén, está nas
mans dos mestres, por enriba do resto da sociedade, que os novos contidos
educativos con carácter dixital se integren no día a día do alumnado, tarefa
que se verá axilizada se son eles mesmos os que os elaboren.
Xa que logo, a
Xunta de Galicia, a través da Secretaría Xeral de Modernización e Innovación
Tecnolóxica vai convocar uns galardóns que premiarán o desenvolvemento de novos
contidos educativos con identidade dixital por parte dos profesores e
profesoras galegas.
Esta convocatoria
foi publicada no Diario Oficial de Galicia do pasado día 6 de abril, xunto coa
resolución pola que se establecen as bases reguladoras da concesión deste
recoñecementos, no marco do Proxecto ABALAR.
A Secretaría
Xeral de Modernización e Innovación Tecnolóxica, dentro do programa Axudas para o desenvolvemento da sociedade
da información, é a encargada de dotar economicamente estes incentivos, nos
que se recoñecerá a calidade de contidos accesibles mediante medios
electrónicos e interactivos.
Os traballos
presentados deberán referirse aos cursos nos que se implantou este ano o
Proxecto ABALAR e a aqueles nos que se vai implantar o vindeiro curso, é dicir,
5º e 6º de Primaria e 1º e 2º da ESO. Para estes dous cursos de Primaria
establécense 4 modalidades, relativas as áreas de Coñecemento do Medio Natural,
Social e Cultural; Lingua Galega e Literatura; Matemáticas ou Educación Física;
e Plástica. No caso do primeiro ciclo da
ESO hai 6 modalidades convocadas, arredor das áreas de Ciencias Sociais; Xeografía
e Historia; Ciencias da Natureza; Educación
Plástica e Visual, Lingua Galega e Literatura;
e Lingua Castelá e Literatura.
Para cada unha
das modalidades anteditas establécense un primeiro premio de 4.500 €, un
segundo premio de 3.500 euros, un terceiro premio de 3.000 € e nove cuartos
premios de 1.000 euros.
Os mestres e
mestres interesados en participar nesta convocatoria teñen de prazo un mes,
contado a partir do día seguinte á súa publicación no DOGA, para presentar os
seus formularios
de solicitude debidamente cubertos.