Minecraft: Story Mode verá a luz o 13 de outubro

venres, 2 de outubro do 2015 Marcus Fernández

O xogo Minecraft converteuse en todo un fenómeno durante os últimos anos, e aínda que este título destaca pola súa liberdade, que abre as portas á creatividade, dende Telltale Games están a traballar con Mojang para converter este mundo nun xogo máis tradicional, nunha aventura que levará por título Minecraft: Story Mode, e que verá a luz o vindeiro día 13, con versións para PC, Xbox 360, Xbox One, PS3, PS4, Wii U, iOS e Android, de xeito que practicamente calquera xogador poderá meterse na pel de Jesse (personaxe que pode ser tanto masculino coma feminino) nunha historia que repartirase en 5 episodios na liña do que fai Telltale Games con outras aventuras.
O xogador xuntarase con distintos personaxes para embarcarse nunha aventura ao longo do mundo real (a principal dimensión de Minecraft) na procura da Orde da Pedra para salvar ao mundo dun horror que se desatou no mesmo. Estes personaxes están interpretados por populares actores como Patton Oswalt, Scott Porter ou Martha Plimpton, así como outros artistas con grande experiencia no mundo da dobraxe de animación, e, para deixar constancia da boa factura deste título, o vindeiro día 12 vai presentarse mundialmente en Hollywood, nunha proxección na que poderá verse o xogo en pantalla grande e que será de asistencia de balde.

Trailer de Minecraft: Story Mode

PUBLICIDADE