Minecraft, It Takes Two, Football Manager e Forza Horizon 5 chegan a Game Pass

O catálogo de xogos do Xbox Game Pass vai mellorar considerablemente no mes de novembro, de xeito que onte mesmo recibiu o xogo Minecraft: Java and Bedrock Editions na súa versión para PC e mañá, grazas á integración de EA Play, inclúe tamén un dos xogos revelación do último ano, It Takes Two, título de acción e aventuras que destacou por ter que xogarse de xeito cooperativo, achegando unha experiencia única (especialmente para parellas) da que podemos gozar en consola, PC e a nube.
O 9 de novembro os xogos que chegarán ao Game Pass tamén son moi importantes, xa que por unha banda teremos o Football Manager 2022 para PC (grande referente no xénero dos simuladores de xestión de clubs de fútbol) e o Football Manager 2022: Xbox Edition, así como o xogo de condución Forza Horizon 5 para consola, PC e a nube.
Para pór a guinda ao pastel, o 11 de novembro chegará ao Game Pass na súa versión de consola Grand Theft Auto: San Andreas – The Definitive Edition, ou sexa, que este clásico moderno pode gozarse en consolas actuais con actualizacións que manteñen fresco un xogo que deixou unha fonda pegada, sendo chave no éxito das seguintes entregas da franquía de GTA.
Aparte dos xogos mencionados, tamén chegarán ao Xbox Game Pass varios títulos independentes: Unpacking, Kill It with Fire e One Step from Eden.