Microsoft convida ás ONG a multiplicar a súa acción social mediante o emprego das TIC

Co principal obxectivo de informar e formar ao terceiro sector sobre cómo poden mellorar o seu funcionamento interno e multiplicar así o impacto social das súas actividades solidarias, “desenvolvendo todo o seu potencial”, Microsoft Ibérica vén de reunir en Madrid a 70 oganizacións non gubernamentais nun encontro anual impulsado pola compañía.
Baixo o título, En que nos axuda a tecnoloxía?, neste encontro espuxéronse, de xeito práctico, tanto as solucións tecnolóxicas como os recursos que as ONG teñen ao seu alcance para poñelas en marcha e obter un rendemento o máis optimizado posible das actividades que se levan a cabo.
A inauguración deste encontro, no que colaboraron a Fundación Chandra, a Fundación Tomillo e Technosite, contou coa presenza de Olvido Nicolás, directora de Responsabilidad Corporativa de Microsoft Ibérica e de Carlos de la Iglesia, director de Desenvolvemento Corporativo de Microsoft Ibérica, quen mostrou a súa satisfacción por poñer a disposición das ONG españolas as ferramentas e os recursos necesarios “para contar cunha infraestrutura que lles permita chegar cada día máis lonxe na súa loita pola igualdade social”.
Pola súa parte, Felipe Giner, responsable do Laboratorio de Innovación Social da Fundación Chandra, amosou como as ONG “poden aproveitar as canles solidarias en Internet, redes virtuais de xornalistas e fontes de información ou buscadores especializados no traballo voluntario para difundir as súas actividades” e aplicar as tecnoloxías na xestión diaria das entidades sociais.
Dende a Fundación Chandra, tamén se informou aos asistentes sobre SoluciónsONG, “un innovador espazo web”, afirman, “dirixido a compartir coñecemento e boas prácticas no terceiro sector”.
Este portal ofrece todo tipo de contidos relativos á xestión interna, buscadores de subvencións, aula virtual e, sobre todo, un completo servizo de asesoría en liña no que voluntarios expertos en distintas áreas despéxanlle ás organizacións dúbidas sobre cuestións legais, fiscais, de xestión, tecnoloxía... Trátase dunha comunidade de 490 voluntarios, 36 deles empregados de Microsoft, que atenden consultas acerca da instalación e emprego das novas tecnoloxías. Os seus responsables veñen de informar que a rapidez de resposta é valorada polos usuarios deste portal cun 9,07.

Programa Dono de Microsoft

O encontro tamén serviu para lembrar os beneficios do programa Dono polo que Microsoft, xunto con Technosite, ofrece unha vía de doado acceso para que as ONGs poidan conseguir o software imprescindible para mellorar o seu funcionamento a tan só un 4 por cento do seu coste real no mercado.
A través da páxina oficial deste Proxecto, as ONGs poden obter os progamas de máis difusión do mercado (dende Windows ata Microsoft Office pasando por produtos para servidores) e, segundo apuntou o director de operacións de Technosite, Lorenzo Alconero, máis de 650 ONG xa se suscribiron ao devandito programa.