Máis de 5.600 persoas dos concellos de Pontevedra teletraballan cos plans da Deputación
venres, 27 de marzo do 2020
A
Deputación de Pontevedra achegou información actualizada sobre o
desenvolvemento das medidas para garantir a protección do seu
persoal durante o estado de alarma e a pandemia de COVID-19, medidas
nas que sobresae o impulso ao teletraballo. Segundo
fixo saber, máis de 550 traballadoras e traballadores da institución
provincial están a desenvolver as tarefas dende os seus domicilios.
Nos concellos, a cifra de persoas que desenvolven o seu labor dende o
fogar, coa axuda dos plans tecnolóxicos da Deputación, é de 5.600.
Volvendo
ao persoal da entidade pontevedresa, o teletraballo das devanditas
550 persoas foi posíbel grazas ao plan de continxencia impulsado
polo Servizo de Novas Tecnoloxías da institución desde comezos de
marzo, que consistiu no reforzo dos servidores informáticos, na
configuración a distancia dos equipamentos informáticos e
telecomunicacións e ata na cesión de material.
Polo
que respecta aos concellos, parte do seu labor é posíbel grazas á
habilitación na nube de servizos como a Administración Electrónica
ou o Padrón Municipal de Habitantes. A aposta polas contornas cloud
ten a vantaxe de permitir a operatividade aínda que non se conten
con servidores locais ou infraestruturas específicas de
telecomunicacións, xa que os servizos préstanse de balde a través
da nube. “Deste xeito”, explica a Deputación, “as persoas
traballadoras dispoñen dun ordenador e de conexión a Internet e
executan as súas funcións e tarefas en remoto, desde os seus
domicilios, con total seguridade”.
Ademais,
a Deputación de Pontevedra fixo saber que en canto a situación se
normalice, vai impulsar unha nova iniciativa pioneira dirixida a
todas as entidades locais da provincia para facer copias de
seguridade na nube.