Maica Larriba destaca o traballo da Policía Nacional nos centros de ensino para garantir navegacións seguras
xoves, 23 de marzo do 2023
A
subdelegada do Gobierno en Pontevedra, Maica Larriba, participou este
mércores 22 de xaneiro no
CEIP de Marcón (Pontevedra) nunha das accións formativas sobre
ciberseguridade que impartiu o Corpo Nacional de Policía no
marco do Plan Director para a Convivencia nos Centros Educativos. No
transcurso do acto co alumnado de sexto de Primaria, Larriba
reivindicou o gran labor educativo que desenvolven os axentes para
formar a comunidade educativa fronte os riscos que poden entrañar as
redes sociais e as novas tecnolóxicas.
“É
moi importante impartir formación neste campo desde etapas temperás
para que o alumnado teña as ferramentas e os coñecementos
necesarios para utilizar os recursos da rede de maneira responsábel
e para frear os ciberdelitos”, indicou.
A
charla versou, concretamente, sobre ciberacoso e sexting, dúas
condutas e accións na Rede que, segundo indicou Larriba, cada vez
son máis comúns entre os pequenos e adolescentes debido ao auxe na
utilización das novas tecnoloxías.
Os
axentes da Policía Nacional explicaron ao alumnado en que consisten
estas prácticas, como detectar e previr o ciberbullyng,
así como os riscos que entrañan actividades como o sexting.
Unha vez finalizada a sesión os estudantes realizaron un pequeno
control no que puxeron a proba os seus coñecementos sobre a materia.
Xunto cos nenos e nenas tamén realizaron o exame a subdelegada e o
comisario xefe de Pontevedra, Juan José Díaz, con resultado de
aprobado todos e todas os presentes.
Maica
Larriba agradeceu a implicación da Policía Nacional neste traballo
así como o do claustro do colexio por desenvolver “un curso que
garante saber navegar de maneira segura por Internet, evitando
colaborar no ciberacoso aos seus propios amigos e compañeiros”. Ao
mesmo tempo, deu os parabéns aos nenos e nenas e animar a “poñer
en práctica todo o aprendido e a ser embaixadores, especialmente
entre as persoas maiores, do bo uso da Internet e das redes sociais”,
expresou.
Durante
o primeiro trimestre do curso 2022-2023, 12.898 persoas membros da
comunidade educativa (alumnado, corpo docente, pais e nais) da
provincia participaron nas actividades formativas e preventivas
dirixidas pola Garda Civil e a Policía Nacional, o que supón un
incremento do 56,5% con respecto ao pasado curso.