Lugo ofrece formación sobre transformación dixital a medio centenar de mozos e mozas

O Concello de Lugo que dirixe Lara Méndez ofrecerá formación gratuíta e semipresencial sobre emprendemento e transformación dixital a medio centenar de mozos e mozas, menores de 30 anos, inscritos no sistema de garantía xuvenil. Os cursos Emprendemento xuvenil e Emprendemento en Industria 4.0 e Intelixencia Artificial desenvolveranse no marco dun convenio de colaboración entre a Área de Desenvolvemento Local e Emprego e a Fundación INCYDE, co-financiados pola UE a través do Fondo Social Europeo.
O primeiro dos cursos terá comezo o vindeiro luns 20 de marzo e as inscricións están abertas a través da ligazón específica da actividade, mentres que a segunda acción formativa celebrarase no segundo trimestre do ano. A duración será de sete semanas, sendo a primeira e última presenciais nas dependencias do Centro de Innovación e Empresas (CEI Nodus) do Concello, en horario de 10:00 a 13:00 horas, e o resto vía streaming.
O obxectivo principal deste curso é “proporcionar unha visión global das distintas áreas funcionais da empresa, para poder determinar oportunidades de mercado e desenvolver un plan de empresa a través do coñecemento das ferramentas de xestión para favorecer a posta en marcha no mercado”. Así, a estrutura do programa contempla sesións grupais, asesorías individualizadas e formación online complementaria, distribuídas nas diferentes áreas de coñecemento: Estratexia Empresarial; Mercadotecnia e TIC (Tecnoloxías da Información e a Comunicación), Innovación, Creatividade e Transferencia Tecnolóxica; e Finanzas.
Esta acción formativa busca tamén capacitar aos mozos e mozas para deseñar un proxecto de transformación dixital cara a Industria 4.0 (factoría dixital) a partir dunha das súas principais tecnoloxías habilitadoras: a Intelixencia Artificial.