Lugo acolle a xornada Software Libre, a solución para a túa empresa

O vindeiro martes 15 de maio, a Sala de Innovación Tecnolóxica Empresarial (SITE) de Lugo, acollerá a xornada Software Libre, a solución para a túa empresa, posta en marcha por varios dinamizadores tecnolóxicos con motivo da conmemoración do Día de Internet.
Víctor González, dinamizador tecnolóxico da Asociación de Empresarios de O Ceao, convoca ós empresarios e a todos aqueles interesados en acudir a este evento cun programa (que podemos ver na fotografía) moi atractivo en prol da implantación dos programas libres nos seus equipos.
Na xornada haberá ordenadores con software libre a disposición dos asistentes así como persoal técnico de apoio e demostracións do funcionamento e das vantaxes que supón a implantación de programas de código aberto.
A inscrición é de balde e entre os asistentes repartiranse CDs co sistema operativo Linux e o programa ofimático OpenOffice.