Lenovo estrea unha liña de accesorios informáticos para mobilidade

Dende Lenovo están a lanzar unha nova marca de dispositivos multipropósito para o ordenador que buscan unha maior produtividade en mobilidade, comezando a familia de produtos Lenovo Go cunha batería externa de 20.000 mAh capaz de alimentar ordenadores portátiles, uns auriculares con micrófono e un rato sen fíos que, aparte de ser multidispositivo, chama moito a atención polo feito de que a súa batería interna poder recargarse por indución.
A Lenovo Go USB-C Laptop Power Bank é unha batería externa moi versátil, que pode achegar até 65 watts, de xeito que é capaz de alimentar ordenadores portátiles mediante cable, aínda que tamén conta cunha superficie de carga sen fíos para accesorios, prestación que combina moi ben co Lenovo Go Wireless Multi-Device Mouse, un rato que pode conectarse á tres dispositivos á vez, podendo saltar de un a outro con só premer un botón, e que pode recargarse a través de USB-C ou mediante carga indutiva Qi, característica que está a ser moi aplaudida por ser unha solución válida para un grande fallo de deseño dos ratos de Apple (que para cargalos mediante cable hai que colocalos boca arriba, de xeito que non poden manexarse durante o proceso).
Estes novos accesorios chegarán ao mercado estadounidense no mes de xuño a un prezo de 89,99 dólares a batería externa e de 59,99 euros o rato multidispositivo.