LG lanza novas unidades Super Multi Blu

venres, 20 de xullo do 2007 Marcus Fernández

Ante a guerra de formatos sucesores do DVD LG decidiu ir pola rúa do medio, e lanza unidades híbridas que nun principio poden resultar moi confusas, xa que, por unha banda, a GGW-H20LI le tanto Blu-ray como HD DVD podendo gravar Blu-ray a 6x (así como os formatos gravables de DVD), mentres que a GGC-H20LI tamén pode ler os dous formatos de alta definición (tecnoloxía bautizada coma Super Multi Blu), aínda que só grava DVD e CD, custando estas novas unidades 500 e 400 dólares respectivamente.
Estas unidades funcionan en ordenadores persoais, de xeito que, como vén sendo habitual, os ordenadores son a porta de entrada das gravadoras dos novos formatos ópticos, mentres que para os salóns das nosas casas LG xa ten o seu Super Blu BH100 que le os 2 formatos de alta definición, aínda que o seu prezo resulta prohibitivo (1.200 dólares).

PUBLICIDADE