LG Fireweb, o novo smartphone co sistema operativo de Mozilla

Co gallo do lanzamento de Firefox OS no Brasil da man da filial local de Telefónica (Vivo) estréase o smartphone LG Fireweb, que sería un dos primeiros smartphones con Firefox OS dun fabricante de peso, seguindo os pasos de Geeksphone, Alcatel e ZTE. Este novo dispositivo amosa certa semellanza ao LG Optimus L5 II, aínda que reducindo a resolución da súa pantalla de 4 polgadas a uns pobres 480 x 320 píxeles.

O LG Fireweb presenta a mesma aparencia exterior que o LG Optimus L5 II

O LG Fireweb funciona cun procesador Qualcomm Snapdragon dun núcleo a 1 GHz, 4 Gb de almacenamento interno (aínda que na nota publicada por Telefónica aseguran que só ten 2 Gb de memoria) ampliable mediante tarxetas microSD de ata 32 Gb, cámara de 5 Mpíxeles con flash LED e batería de 1.540 mAh, está dirixido inicialmente aos mercados emerxentes de Brasil, México, Perú e Uruguai, e o seu prezo de venda no Brasil é de 449 reais en prepagamento e 129 reais en contrato (150 e 43 euros respectivamente).
Con estas prestacións e prezo parece que o LG Fireweb vai telo moi difícil, pois existen terminais con Android máis económicos, e aínda que Firefox OS conta con aplicacións como Facebook, Badoo, Tuenti e Twitter, carece dunha ferramenta tan crucial como hoxe é WhatsApp, o que parece ser o seu elo máis fraco.

Vídeo de presentación do LG Fireweb