Just Cause 3 sae á venda en plena campaña de Nadal

Para completar o catálogo de xogos que animarán esta campaña de Nadal, chega hoxe ás tendas o xogo de acción Just Cause 3 para Xbox One, para PlayStation 4 e para PC, que ten un prezo de 69,99 euros na súa versión para consolas domésticas e de 49,99 euros para ordenadores persoais.
Este xogo chega para atender a demanda de xogos que vaian máis aló de títulos deportivos e shooters en primeira persoa, xa que achega unha experiencia de acción moi cinematográfica da que esta franquía xa fixo gala en anteriores entregas e que agora consegue ser aínda máis espectacular grazas á potencia das consolas de nova xeración.
Just Cause 3 permítenos explorar unha paradisíaca illa mediterránea con grande liberdade de movementos verticais (de xeito que podemos facer salto base ou empregar un paracaídas por todo este mundo aberto); utilizar o gancho e o para escalar edificios, roubar vehículos, moverse rapidamente ou amarra obxectos e, en definitiva, desatar o caos de xeitos impresionantes; causar a destrución de bases militares, portos, prisións, comisarías... para derrocar ao ditador local; equiparse cun arsenal variado (dende escopetas até lanzamísiles); elixir entre unha grande variedade de vehículos (lanchas motoras, cazas de combate, helicópteros, coches deportivos...); superar numerosas misións; coleccionar obxectos e gozar incluso de funcións en liña. Un xogo, sen dúbida, a ter moi en conta de cara ás compras de Nadal.