Intel presenta un novo tablet deseñado para uso escolar

mércores, 11 de abril do 2012 Marcus Fernández

O Intel Studybook é resistente a po, auga e caídas.

Despois dunha forte aposta pola introdución de ordenadores ultraportátiles nas aulas co Classmate PC, Intel presenta agora un novo dispositivo que pretende converterse nunha fiestra ao mundo para o alumnado, o tablet Studybook, que destacará por un deseño reforzado (para resistir a manipulación por parte de cativos) e incorporar software educativo.
O Studybook funciona cun procesador Intel Atom Z650, ten unha pantalla LCD multi-táctil capacitiva de 7 polgadas cunha resolución de 1.024 x 600 píxeles, 1 Gb de RAM, cámaras frontal e traseira, USB 2.0, saída HDMI, fendas para tarxetas microSD e SIM (no modelo con conectividade 3G), Wi-Fi, Bluetooth (opcional), unha autonomía de ata 5 horas e media, unhas medidas de 207 x 135 x 16,5 milímetros e un peso de 525 gramos. O seu prezo debería ser inferior aos 200 dólares.
Estará dispoñible en capacidades de 4, 8, 16 e 32 Gb, poderá funcionar con Windows 7 e Android 3.0 e, no tocante á súa resistencia, podería soportar unha caída a 70 centímetros de altura e tamén resiste po e auga (dentro dos parámetros da certificación IP41).
Dende Intel consideran que os tablets son uns dispositivos máis atinados para a docencia que os ordenadores portátiles, ofrecendo unha experiencia máis próxima aos libros de texto (o que facilita a adaptación das experiencias educativas) sen pecharse á interactividade, permitindo incluso debuxar e tomar notas. Buscan así definir a educación para o século XXI como amosan no seguinte vídeo:

O Studybook está deseñado pensando nunha boa integración nas aulas
O tablet conta con cámaras frontal e traseira

PUBLICIDADE