Ineo desvela este venres o potencial do novo programa europeo de apoio ás TIC
martes, 1 de febreiro do 2011
Facer fronte común para que a distancia que aínda
separa ás novas ferramentas dixitais das nosas empresas e a cidadanía se acurte
o máximo posible. Este é un dos obxectivos da asociación empresarial Ineo e este é o alicerce da xornada que
organiza o vindeiro 4 de febreiro en Santiago de Compostela, un encontro
vinculado ao Programa
europeo de Apoio ás Políticas TIC (ICT-PSP) e que conta coa colaboración da
Fundación para o Fomento da
Calidade Industrial e o Desenvolvemento Tecnolóxico de Galicia. A xornada
achégase como un altofalante do devandito programa, co que comparte obxectivos:
acadar unha meirande incorporación e un mellor emprego das novas tecnoloxías na
cidadanía, nos gobernos e nas empresas, sobre todo nas de mediano e pequeno
tamaño (pemes).
Esta iniciativa, informan Ineo e a dita
fundación, diríxese á implantación de tecnoloxía TIC a nivel europeo. Tendo en
conta isto, engaden, ten amplas posibilidades de constituírse como unha “boa oportunidade para abrir novos mercados
en colaboración con outros axentes do eido da UE”. A xornada será polo
tanto unha explicación en detalle do dito programa europeo, poñendo en xogo
todo tipo de recursos humanos e técnicos para a resolución de dúbidas e
achegando consellos útiles para participar dende a nosa terra na convocatoria.
A sesión, que terá unha metade teórica e outra
práctica, celebrarase na sede da Confederación de Empresarios da Coruña, na rúa
Eduardo Pondal. As actividades darán comezo ás 10.00 horas, coa recepción de
asistentes e, dez minutos máis tarde, a apertura da xornada a cargo de Jorge
Cebreiros, presidente de Ineo. Máis tarde intervirá Xavier Alcalá, director da
OPIDI (Fundación para o Fomento da Calidade Industrial), quen achegará unha
explicación da convocatoria de axudas do programa europeo. A partir das 10.45
horas, Lucía Gregorio (Ineo) e Ana Fernández (OPIDI_Fundación Fomento da Calidade)
levarán a cabo unha serie de mesas de traballo prácticas sobre os vieiros de
desenvolvemento que pon en xogo o programa.
Segundo informa Ineo, a asistencia á xornada é
totalmente de balde, e deberá levarse a cabo a inscrición na conta de correo administracion@ineo.org, indicándose
o nome e máis os apelidos da persoa interesada así como a mesa de traballo á
que queira acudir.