Inauguradas as charlas sobre transferencia e tendencias tecnoloxías de AMTEGA e AETG
venres, 4 de outubro do 2019
A
AMTEGA e a AETG organizaron este xoves a conferencia A revolución
da Intelixencia Artificial na medicina actual, que formou parte
do programa de transferencia de coñecemento TIC do convenio de
colaboración asinado ente ambas entidades. O
relatorio foi impartido na Cidade da Cultura polo catedrático de
Ciencias da Computación e Intelixencia Artificial da Universidade
Pública de Navarra e profesor honorario da University of Nottingham
(Reino Unido), Humberto Bustince. Os sistemas intelixentes e as
súas aplicacións na medicina actual centraron boa parte da súa
intervención.
Bustince,
fundador de grupo de investigación da UPN sobre Intelixencia
Artificial e Razoamento Aproximado, amais de merecedor este ano do
Premio Nacional de Informática, inaugurou o ciclo de charlas
tecnolóxicas que organizan a Asociación de Enxeñaría en
Telecomunicación de Galicia (AETG) e a Axencia para a Modernización
Tecnolóxica de Galicia (AMTEGA).
A
directora da axencia autonómica, Mar Pereira, que inaugurou o
encontro xunto co presidente da AETG, Julio Agrelo, sinalou que o
obxectivo destes encontros “é compartir con expertos de primeiro
nivel ideas e experiencias ao redor das tecnoloxías disruptivas, que
centrarán centrar as estratexias dixitais da próxima década e,
loxicamente, a Estratexia Dixital de Galicia 2030”. Pereira lembrou
que a futura estratexia dixital galega, actualmente en fase de
elaboración, fará foco nas oportunidades de aplicar novas
tendencias tecnolóxicas en todos os ámbitos da economía; na
necesidade de atopar solucións para diminuír fenda entre a demanda
e a dispoñibilidade de traballadores con competencias dixitais
avanzadas, e no impulso ao emprendemento tecnolóxico.
A
directora engadiu que Galicia “aspira a ser a segunda Comunidade
que elabore unha estratexia sobre Intelixencia Artificial” e que se
está a traballar na creación “dunha rede de nodos de
especialización tecnolóxica coordinados desde o Gaiás”, por
exemplo o Nodo Galicia 5 G, que xa está en marcha, e os de
Blockchain e de Intelixencia Artificial, en fase de impulso.