#INLUGO comeza con forza mirando cara ao futuro da comunicación
venres, 7 de xuño do 2013
Esta
tarde principiou o I Congreso de Cultura
Dixital e Redes Sociais #INLUGO no Pazo de San Marcos de Lugo, xuntando
durante dous días a máis de 250 profesionais e entusiastas da comunicación e o social media, para debater e disertar
sobre temas de grande interese, podendo seguirse tamén o encontro de xeito remoto
a través de streaming de vídeo e de interacción a través
das redes sociais.
Tras unha benvida institucional do presidente da Deputación de Lugo, José Ramón
Gómez Besteiro, desenvolveuse a mesa redonda titulada Olivetting que contou coa participación dos xornalistas e
comunicadores Nacho de la Fuente (La Voz de Galicia), Xabier Xanmartín (El
Correo Gallego), Pilar Portero (Huffington Post) e Ángel Vaqueiro (El
Progreso), que falaron de novos formatos da comunicación, do sempiterno debate
sobre os contidos de balde ou de pagamento na Rede, da influencia dos blogs
(como medios en si mesmos e como ferramenta de marca persoal de especialmente
interesa para profesionais da comunicación, que poden manter unha identidade en
liña con independencia do medio para o que estean a traballar), a precariedade
laboral nos xornais e a proposta de bo xornalismo como vía de salvación para o
periodismo.
- Sebastián Muriel asegurou que Tuenti quere consolidarse como unha plataforma de comunicación social
Sebastián Muriel, vicepresidente de Desenvolvemento Corporativo de Tuenti,
expuxo a filosofía da compañía na que traballa, destacando a súa popularidade
entre a mocidade como un espazo privado na Internet, distanciándose claramente
de Facebook e achegándose a WhatsApp, por defender que o éxito agora está
ligado ao contorno móbil, o que ilustrou ao comentar a forza que tomou
Instagram grazas a ser unha plataforma pensada directamente para dispositivos
móbiles. Muriel chegou a asegurar que Tuenti non é unha plataforma de redes
sociais, senón unha plataforma de comunicación social, deixando claro unha vez
máis a dirección na que camiña Tuenti.
- Mario Tascón explorou as tendencias actuais da comunicación
O xornalista Mario Tascón impartiu un relatorio sobre tendencias da
comunicación, como os megadatos, a realidade aumentada e as novas en tempo real,
ás que engadiu as posibilidades creativas na escritura en Twitter e incluso
unha clasificación
de tuiteiros a xeito de aviario. Como mensaxe de cara á
actual crise do medio, Tascón
estableceu unha analoxía cun tsunami, comentando que o único xeito de
sobrevivir ao mesmo nun barco é encarándoo.
- Víctor Grande pechou a sesión de hoxe con moito humor
Rematou a xornada cunha mesa redonda sobre Turismo e Internet e unha actuación humorística de Víctor Grande, quen tamén intervirá en #INLUGO mañá na sesión de tarde, cun relatorio de 15 minutos no que defenderá a Internet como escaparate profesional. Entre os relatores de mañá tamén podemos destacar a Óscar Reboiras (community manager de R), Javier Pedreira (Microsiervos), Jacobo Lázare (Disco Azul) e Rixar García (taxista que tira grande proveito de Twitter).