IA feita na casa: Ayco impulsa a dixitalización do comercio electrónico desde Vigo

A intelixencia artificial xa non é unha promesa futurista nin algo reservado a grandes multinacionais tecnolóxicas. Desde Vigo, unha empresa local leva anos demostrando que a innovación tamén se constrúe desde o territorio, con coñecemento propio e solucións reais para as empresas. Ese é o caso de Ayco Internet, compañía galega especializada en desenvolvemento tecnolóxico e solucións dixitais avanzadas, que recentemente puxo en marcha un ambicioso proxecto de intelixencia artificial aplicado ao comercio electrónico grazas a unha axuda pública á innovación.
O proxecto, denominado CIES (Commerce Intelligence & Enrichment System), nace cun obxectivo moi concreto: automatizar a creación de fichas de produto para tendas en liña, unha das tarefas máis críticas (e custosas) para calquera comercio dixital. Detrás de cada produto que vemos nunha web hai horas de traballo recompilando información técnica, redactando descricións comerciais, buscando imaxes axeitadas, verificando normativas ou comparando coa competencia. CIES utiliza algoritmos de IA para realizar todo ese proceso de forma automática, con fiabilidade e con marxe de flexibilidade e adaptación.
Grazas a esta solución, abonda con introducir unha referencia ou un código EAN para que o sistema sexa capaz de identificar o produto, recompilar información de fontes oficiais, xerar textos optimizados para a venda en liña, obter imaxes válidas do fabricante, incorporar etiquetas enerxéticas europeas e analizar produtos similares do mercado. Todo iso cun enfoque práctico, pensado para integrarse directamente en plataformas reais de comercio electrónico.
Este proxecto foi posible grazas a unha subvención pública convocada por Instituto Galego de Promoción Económica, IGAPE, dentro do programa IG408M - Intelixencia Artificial IA360 que cobre parte do investimento necesario, permitindo a Ayco acelerar o desenvolvemento tecnolóxico e levar a solución desde unha contorna de probas avanzado ata a súa validación en escenarios reais de uso. Para o encaixe e tramitación desta actuación na liña de axudas indicada, Ayco Internet dispuxo do apoio e asesoramento da Asociación de Empresas de Tecnoloxía de Galicia (INEO)
Ao longo de 2025, un equipo multidisciplinar da empresa estivo traballando na evolución desta ferramenta, apostando por tecnoloxías de código aberto e por unha arquitectura modular que garanta a súa adaptación a distintos sectores e tamaños de empresa.
Máis aló do proxecto concreto, CIES é tamén un reflexo do ADN de Ayco. Con sede en Vigo e unha traxectoria consolidada, a empresa dá forma a solucións a medida en ámbitos como o desenvolvemento web avanzado, o comercio electrónico, a automatización de procesos, a integración de sistemas, os sistemas de xestión de dispositivos móbiles (MDM) e a intelixencia artificial aplicada. A súa filosofía baséase en acompañar ás empresas na súa transformación dixital con solucións reais, útiles e respectuosas co medio, afastadas de modas pasaxeiras.
Nun contexto no que a dixitalización é clave para a competitividade do tecido empresarial, especialmente das pemes, proxectos como este demostran que a innovación tecnolóxica tamén se xera a nivel local, con impacto directo na economía e na modernización de sectores tradicionais como o comercio. Ademais, a iniciativa inclúe accións de difusión e divulgación para achegar o coñecemento tecnolóxico a empresas, asociacións e eventos do sector, reforzando o ecosistema dixital galego.
Ayco Internet continúa así apostando por unha tecnoloxía útil, próxima e con impacto real, demostrando que a intelixencia artificial, ben aplicada, non substitúe persoas, senón que lles permite centrarse en tarefas de maior valor. Desde Vigo, e con apoio público, a innovación segue avanzando.