Hack A Boss ofrece as últimas prazas do seu Bootcamp

A escola coruñesa de programación Hack A Boss oferta esta semana as últimas prazas ao seu Bootcamp de programación full stack. A formación comeza o próximo 2 de maio e durante 16 semanas dota ao alumno de todas as habilidades técnicas necesarias para entrar no sector do desenvolvemento de aplicacións web, unha das áreas máis demandadas na actualidade.
Con estes estudos xa se formaron máis de 600 persoas dende 2017, tanto a través do formato presencial como do online. Un dos puntos fortes do programa formativo desta edición é a presenza de profesores con amplas experiencias en grandes compañías tecnolóxicas como Google, Microsoft, Amazon ou Facebook; así como expertos en start-ups de primeiro orden no mercado tecnolóxico en España. Estes docentes impartirán talleres na fase do programa coñecida como aceleradora de talento (Boost Academy), á que teñen acceso todos os participantes e ten por obxectivo que o alumnado poida aprender de profesionais con experiencia nas grandes empresas tecnolóxicas do mundo. A formación de HACK BOSS diríxese a todo tipo de públicos, tanto a alumnado de mercadotecnia (marketing) ou informática como a público sen coñecementos previos.
A academia sinala que o financiamento dos estudos “tamén é flexíbel”, xa que a escola faise cargo do custe do Bootcamp e ofrece a posibilidade de pagar a formación unha vez que os/as estudantes atopen emprego. De feito, a escola inclúe diferentes actividades con empresas colaboradoras co obxectivo de que o alumnado acade oportunidades de emprego.