HAWKEN chega a Xbox One como xogo free-to-play

venres, 1 de xullo do 2016 Marcus Fernández

Dende hai un par de anos os xogadores de PC poden gozar a través de Steam mediante a modalidade de acceso anticipado do shooter en primeira persoa HAWKEN, que está previsto que se relance como xogo completo nos vindeiros meses, pero antes de rematar a versión para ordenadores persoais dende Reloaded Games decidiron que este título free-to-play podía ter moi boa saída nas consolas de nova xeración, e hoxe mesmo estreou a súa versión para Xbox One, de xeito que os usuarios da consola de Microsoft poden xa descargar de balde este FPS de mechas.
En HAWKEN podemos meternos no interior de máquinas de guerra mecanizadas que enfrontaranse nun campo e batalla dun mundo distópico, ofrecendo un sistema de xogo frenético e táctico, con mechas personalziables (dos que hai 58 diferentes repartidos en 3 clases), 6 modos de xogo (cooperativos e competitivos), 9 escenarios impresionantes e unhas mecánicas doadas de aprender (e difíciles de dominar) que convidan ao xogador a formar equipos para unha mellor experiencia.
Para adquirir mechas, armas, obxectos, elementos internos, aspectos e moito máis HAWKEN conta cunha moeda de seu que podemos adquirir con cartos reais, modelo de negocio que sostén a este prometedor título, aínda que durante a semana de lanzamento do xogo tamén está dispoñible un Paquete Fundadores que por 49,99 euros inclúe numerosas vantaxes que van dende o acceso anticipado ao mecha G2-Charge até grandes cantidades de moedas do xogo para poder desbloquear obxectos e realizar melloras ao instante, e que viría a ser o equivalente a mercar o xogo durante o seu lanzamento (pese a que estamos ante un título de balde).

O xogo permítenos manexar mechas personalizables en intensos combates

PUBLICIDADE