God of War Ragnarök chegará ao mercado a semana que vén

O vindeiro mércores sairá á venda o agardado xogo God of War Ragnarök nas súas versións para PS4 e PS5, no que está considerado como o derradeiro grande xogo de Sony que mantén un pé na anterior xeración de consolas PlayStation, aínda que medios especializados xa están advertindo de que, aínda que o xogo corra sen problemas nunha PlayStation 4, esixe demasiado a tal máquina, de xeito que durante as partidas os ventiladores da consola están a plena potencia, o que pode resultar moi molesto (chegan a recomendar xogar con auriculares para unha experiencia satisfactoria).
Pese a que o máis recomendable sería gozar deste xogo en PlayStation 5, a escaseza desta consola provocará que aínda vaia ter unha impresionante base de xogadores en PS4, que aseguran que poderán gozar dunha experiencia de xogo digna, ou sexa, que non acontecerá o mesmo que con Cyberpunk 2077, título que resultaba imposible de xogar en consolas da anterior xeración. Os meirandes problemas que terán os xogadores de vellas consolas son os elevados tempos de carga (detalle considerado o mellor avance nas consolas de nova xeración) e o mencionado ruído que provoca a máquina ao estar sometida ao grande estrés que supón a carga gráfica de God of War Ragnarök, sacrificios que moitos xogadores estarán dispostos a facer para gozar do episodio final da que posiblemente sexa a mellor saga para consolas da anterior xeración.
Nas últimas horas tamén apareceu o lote que permitirá facerse con este xogo xunto cunha consola PlayStation 5, que pode reservarse en tendas como Carrefour, e que chega cunha mala nova para a meirande parte dos seareiros das aventuras de Kratos, xa que para poder mercar o novo xogo cunha PS5 tamén hai que facerse cun segundo mando DualSense e os xogos FIFA 23 e The Last of Us Parte I, polo que o prezo total quedaría en 823,95 euros. Este pack vese extraordinariamente forzado, xa que para xustificar a obriga de adquirir un segundo mando (algo que carece de sentido para quen está interesado en God of War Ragnarök) inclúen o FIFA 23, título dirixido a un público moi diferente, e co que si podería ter sentido a adquisición dun mando adicional.