Gigabyte prepara novos ordenadores de sobremesa para gamers

martes, 27 de decembro do 2016 Marcus Fernández

Os que desexen un ordenador de sobremesa para xogar non teñen por que recorrer a equipos de grandes dimensións, senón que tamén existen opcións moi atractivas que consisten equipos de tamaño reducido e deseño coidado que teñen potencia dabondo para tirar proveito dos últimos xogos para PC, pero dando a impresión de que temos diante unha consola de videoxogos. Nesta liña temos a gama BRIX de Gigabyte, que xa podemos ver na web chinesa da compañía, que estará dispoñible en potentes tarxetas gráficas nVIDIA 1070 ou 1080 con 8 GB de memoria, de xeito que non tería problemas para mover xogos en 4K ou sistemas de realidade virtual.
Estes novos ordenadores de Gigabyte funcionan con procesadores Intel Core i7-6700K (de 4 núcleos a 4 GHz), 16 GB de RAM, unha unidade SSD M.2 de 240 GB e un disco duro de 1 TB (7.200 rpm), Wi-Fi AC, Gigabit Ethernet, 1 porto USB-C, 1 porto USB 3.1, 3 portos USB 3.0, toma para auriculares e micrófono e unhas dimensións de só 384 x 276 x 128 milímetros (o que supón un volume aproximado de 10 litros).
O curioso deseño destes equipos non buscaría só ser rechamante, senón que tamén tería certa funcionalidade, de xeito que en momentos nos que o rendemento do ordenador chegue ao máximo, abriranse automaticamente as súas comportas superiores para permitir unha maior circulación de aire, contribuíndo así á refrixeración do equipo.

PUBLICIDADE