GPD Win 2, a consola portátil que realmente é un ordenador en miniatura

luns, 15 de xaneiro do 2018 Marcus Fernández

En 2016 veu a luz a GPD Win, unha especie de consola de videoxogos portátil que realmente era un ordenador portátil de tamaño moi reducido, e os seus responsables están a preparar a súa sucesora, a GPD Win 2, que está a buscar financiamento en IndieGoGo, plataforma de micromecenado na que é posible facerse con esta máquina con hardware renovado por 649 dólares (529 euros), o que suporía un 27% de desconto fronte ao prezo que pretenden que se venda o produto cando sexa unha realidade comercial.
A GPD Win 2 sería unha consola portátil cun procesador Intel Core m3-7Y30 e gráfica Intel HD 615, con 8 GB de RAM e 128 GB de SSD en formato M.2, pantalla H-IPS de 6 polgadas cunha resolución de 1.280 x 720 píxeles e dúas baterías de 4.900 mAh que permiten unha autonomía de entre 6 e 8 horas, todo dentro dun corpo de só 162 x 99 x 25 milímetros.
A intención deste trebello é poder correr populares xogos para PC a xeito de consola portátil, no que algúns verán agora un concepto bastante próximo grazas á Nintendo Switch, aínda que desta volta temos un teclado QWERTY no corpo da máquina que tamén integra panca de xogo a ambos lados, cruceta dixital e botóns de disparo.
Tamén podemos empregar o seu porto micro HDMI para facer uso de pantallas externas (soportando unha resolución de até 4.096 x 2.304 píxeles).
Se ben a GPD Win 2 non é unha máquina de moita potencia, comparable a portátiles para gaming, achega un rendemento suficiente para correr dignamente xogos como Grand Theft Auto V, League of Legends, DOTA2, World of Warcraft ou Overwatch sempre que non se empregue unha configuración gráfica elevada, converténdose nunha interesante solución para os xogadores de PC que busquen unha alta mobilidade, ou incluso que queiran tamén gozar do amplo catálogo de xogos e emuladores dispoñibles para Windows 10, sistema operativo que emprega a GPD Win 2. Prevese que o produto comece a remitirse aos seus mecenas no mes de maio.

A GPD Win 2 pode empregarse como un ordenador portátil ordinario, xa que funciona con Windows 10

Prototipo da GPD Win 2 correndo o xogo Overwatch

PUBLICIDADE