Filtran as especificacións dos Moto C e Moto C Plus

Lenovo parece querer recuperar con forza a marca Motorola, e tras a renovación dos Moto G cos novos Moto G5 e G5 Plus (os primeiros Moto G con carcasa de aluminio) situándose como os principais referentes nos smartphones de gama media, están agora a preparar novos dispositivos de entrada, o que poderiamos considerar como os sucesores dos Moto E, pero que desta volta mudarán o seu nome e incluso poderían ter prezos de partida máis baixos, abríndose a un público moi amplo.
Os futuros Moto C e Moto C Plus serían smartphones con pantalla de 5 polgadas que no modelo básico terían unha resolución de só 854 x 480 píxeles, mentres que no modelo Plus gozarían de alta definición (1.280 x 720 píxeles). Estes teléfonos terían distintas configuracións de hardware, de xeito que o Moto C estaría dispoñible cun procesador MediaTek de 32 bits a 1,3 GHz, 1 GB de RAM, 8/16 GB de almacenamento interno (ampliable mediante microSD), cámaras de 5 e 2 Mpíxeles, batería de 2.350 mAh e conectividade 3G ou 4G en función do modelo; mentres que o Moto C Plus sería un smartphone moito máis acorde ás necesidades actuais, cun procesador de 64 bits a 1,1 GHz, 1 ou 2 GB de RAM (en función do territorio), 16 GB de almacenamento interno (ampliable mediante tarxetas microSD), cámaras de 8 e 2 Mpíxeles, batería de 4.000 mAh e conectividade 4G.
Polo momento non se anunciaron oficialmente estes terminais, pero de confirmarse as especificacións mencionadas parece evidente que o Moto C será un dispositivo orientado a usuario moi pouco esixentes e a mercados emerxentes, mentres que o Moto C Plus sería un terminal bastante recomendable para usuarios que non demanden grandes prestacións pero queiran gozar dun smartphone cunha versión pura de Android e cunha boa autonomía.