Falece aos 94 anos Gordon E. Moore

O número de transistores que pode integrarse nun microprocesador medra a un ritmo case constante ano tras ano (dobrándose cada 18 meses aproximadamente) no que deu en chamarse a Lei de Moore, na honra do cofundador de Intel, Gordon E. Moore, que foi quen a formulou en 1965, e quen vén de falecer aos 94 anos na súa casa de Hawaii.
Moore fundara Intel con Robert Noyce en 1968, ocupando cargos de grande responsabilidade até 1987, aínda que non deixaría completamente a compañía até 2006.
O enxeñeiro californiano xogou un rol moi importante no sector tecnolóxico a través da súa compañía e doutros proxectos anteriores che contribuíron á evolución dos semicondutores, aínda que no presente século a súa actividade centrouse principalmente en causas filantrópicas desenvolvidas na Gordon and Betty Moore Foundation, canalizando doazóns de máis de 5.100 millóns de dólares.