Expertos da educación sinalan que as TIC poderían limitar a capacidade intelectual dos escolares
mércores, 22 de agosto do 2007
Nun artigo publicado recentemente en MSN,
diversos expertos en educación dos Estados Unidos aseguran que o uso que se fai
da tecnoloxía nos centros escolares no devandito país (que é o mesmo ca no
resto do mundo desenvolvido) podería poñerlle atrancos ó proceso de aprendizaxe
en troques de potencialo, como decote se pensa. Tendo en conta que hoxe en día
calquera estudante, amais de estudar, ten que crear presentacións, redactar e
maquetar traballos prácticos ou pescudar na Rede información para os seus
traballos, a pregunta que moitos educadores e investigadores están a facerse é
se isto realmente acaba por ser un método didáctico máis eficaz ou non. Estes
pregúntanse: até que punto os estudantes están a aprender o uso das novas
tecnoloxías en lugar de adquirir aqueles coñecementos incluídos nos programas
das escolas?
O autor do libro A mente que pestanexa: Salvando a educación da falsa promesa da
tecnoloxía (The Flickering Mind: Saving Education From the False Promise of
Technology ), Tom Oppenheimer, é un dos máis críticos coa chegada dos ordenadores
ás aulas de xeito incontrolado, e asegura que as pescudas na Rede, unha visita
virtual a un museo ou até o feito de pintar cun rato en lugar de facelo cun
lapis ou pincel está a “afectar xa ó maxín” dos escolares, proceso que remata
por “limitar a súa capacidade mental”.
Por outra banda, Dan Leyes, profesor de ciclo
superior durante os últimos vinte años, comparte parcialmente a visión dos detractores
da tecnoloxía, e segundo as súas observacións na aula, este profesional do
ensino considera que “os estudantes cren
que fan ben (un traballo) cando curtan e pegan cantidades de información para
logo poñelas nas presentacións e lelas durante as exposicións na aula.” Se
ben agora é máis doado achar información grazas á Rede, este profesor de Nova
Jersey teme que o xeito de investigar dos alumnos lles impida interiorizar do
mesmo xeito que cando tiñan que “traballar
moito máis para atopar e rexistrar información, proceso que acababa por
facilitar a xenuína comprensión” hai uns poucos anos.
A chegada da tecnoloxía nas aulas tamén está a
facer que os profesores de matemáticas teñan problemas cos alumnos, que no
intre de facer cálculos adoitan a botar man das calculadoras en troques de
facer os mesmos mentalmente ou nun caderno. Elona Hartjes, profesora de
matemáticas dunha escola secundaria de Ontario, Canada, di que ten que explicar
ós seus alumnos que senón fan os cálculos mentalmente “as neuronas coas que se fan as contas acabarán por esmorecer” e que
por mor deste mal hábito os alumnos “serán
menos intelixentes”. Sobre o emprego da tecnoloxía noutros eidos do
estudio, a mestra canadense sostén que o máis importante é que “a tecnoloxía poida ser usada coma unha
ferramenta para axudar os alumnos na escola” para o que “deben saber usala para o seu beneficio”.
Os
portátiles na aula: distraen o axudan?
Outro dos grandes debates actuais consiste en
tentar aclarar se o uso dos portátiles na aula pode ou non ser un atranco para
a atención dos alumnos. Se ben aínda é moi miúdo o emprego de portátiles nos
centros de ensino, algúns profesores permiten o manexo dos mesmos “para tomar apuntamentos” e mesmo
incentivan o uso dos equipos na aula. Contrariamente o que estes mestres cren,
un estudo
levado a cabo na Universidade de Winona State en Minnesota amosou que os portátiles
realmente interfiren no proceso de aprendizaxe. As taxas expostas na
investigación citan unha media de 17 minutos (dos 75 que dura unha clase) no
que o alumno fai cousas no seu ordenador que nada teñen que ver coa clase, como
ler o correo electrónico (un 81 por cento dos enquisados dixo que aproveita o
tema de clase para isto), chatear con
amigos (un 68 por cento usa sistemas de mensaxes na aula), navegar na Rede (43
por cento) e até xogar co ordenador (un 25 por cento). O dato máis
significativo recollido no estudo é que os alumnos que levan o portátil á clase
obtiveron cualificacións levemente máis baixas (un 5%) ca os que non o fan.
Neoloxismos
e sintaxe sui generis por mor dos SMS
As abreviaturas e novas formas sintácticas
teñen sido dende sempre un aliado no intre de tomar apuntamentos, pero agora, e
tralo uso masivo de novos termos para aforrar caracteres nas mensaxes SMS,
semella que se vai gañando un espazo nos traballos e até nos exames. No medio
dun debate mundial que ten alporizados a moitos defensores do correcto emprego
da lingua, as autoridades neocelandesas chegaron ós titulares da prensa
anglofalante ó autorizar o uso da linguaxe abreviada (denominada “text-speak”) nos seus exames nacionais.
Neste senso, a escritora Mignon Fogarty,
responsable de uns dos podcasts de
máis éxito de 2006 sobre o correcto uso da gramática, opina que os alumnos
están a ser “tentados” a empregar abreviaturas
cando teñen un tempo limitado para entregar un exame. De feito, a graduada
superior en lingua inglesa asegura que tendo en conta que os rapaces envían
mensaxes decote e que ó tratarse dun “adestramento
diario” pode ser que mesmo se inclúan as devanditas abreviaturas de xeito “inconsciente”.
700 millóns
de dólares anuais para tecnoloxía no ensino
Entre os seareiros do uso das novas
tecnoloxías na aula, o máis grande propulsor das mesmas parece ser Estados
Unidos. Segundo o investigado por Mathematica Policy Research Inc, o país inxecta
máis de 700 millóns de dólares anualmente en medidas que favorezan a chegada da
devandita vaga informática ás aulas do país. Ademais dos políticos hai quen di
que en xeral os rapaces consideran a tecnoloxía “algo atractivo” e que este feito pódese empregar como reclamo para
que aquelas actividades consideradas aburridas deixen de selo. Erica Braverma,
profesora dunha escola en New Jersey asegura que os alumnos teñen “adoptado o uso de blogs, wikis, e poscasts”
e que isto fai que se interesen por certos temas que considerarían pesados ó lelos
nun libro.
Sobre a cantidade de esforzos e diñeiro investido por particulares, institucións e o Estado en favorecer este novo fenómeno, Oppenheimer asegura que “non existe ningún estudo serio que probe que a incorporación das novas tecnoloxías teña un impacto significativo na aprendizaxe”. “ En que estamos gastando o noso diñeiro?” pregunta o escritor e polo visto este debate non fixo máis que comezar.