Estudan as vantaxes do uso do móbil por parte dos menores
martes, 25 de maio do 2010
O Instituto Nacional de Tecnoloxías da
Comunicación (INTECO) e Orange
España presentaron na Secretaría de Estado de Telecomunicacións e para a
Sociedade da Información o Estudo sobre
seguridade e privacidade no uso dos servizos móbiles polos menores españois
elaborado conxuntamente por ambas as dúas entidades no que achegan un
diagnóstico bastante atinado sobre o emprego actual do móbil entre nenos e
adolescentes españois de entre 10 e 16 anos.
Segundo o mesmo, os pais e nais españois
séntense máis seguros sabendo que os seus fillos levan un teléfono móbil para
poder localizalos cando están fora da casa.
Esta é unha das conclusións ás que se
chega no informe, elaborado a partir de 644 enquisas persoais realizadas a
menores e a pais ou titores de 322 fogares españois, ademais das achegas de 55
expertos na materia, que revela que a idade de inicio á telefonía móbil entre os
nenos se sitúa hoxe en día entre os 10 e os 12 anos, en liña con outros países
europeos.
Na análise das motivacións respecto do
acceso dos menores á tecnoloxía móbil está precisamente a posibilidade que
proporciona aos seus pais “o feito de
telos localizados”, aspecto que recoñecen a gran maioría dos nenos
entrevistados (90,7 por cento) e os seus proxenitores (88,5 por cento). É
interesante destacar que ter o neno mellor localizado non impide que os menores
consideren que dispoñer dun móbil outórgalles máis independencia e privacidade
nas súas relacións persoais. É máis, o 69,6 por cento dos nenos pensan que “ter un móbil lles concede máis autonomía”.
Así, como sinala Fernando
Ballestero, secretario xeral de Orange España,
"no estudo consideráronse 4 factores
que contribúen ao acceso á telefonía móbil polos nenos e adolescentes: o
teléfono móbil como símbolo de iniciación á adolescencia, como ferramenta para
tranquilizar os pais, como ferramenta de protección do menor e, finalmente,
como instrumento de integración co ámbito de iguais".