Este sábado comeza a súa andaina na Coruña a Comunidade de Creadores de Contido en Galego
venres, 13 de decembro do 2019
Coa
chegada da recta final de ano comeza a súa andaina unha nova
plataforma creativa na cidade da Coruña, co engadido extra de facer
gala dun compromiso firme coa xeración de recursos na nosa lingua.
Estamos a falar da Comunidade de Creadores de Contido en Galego, a
CCCG, que xorde, nas súas palabras, coa vontade de xuntar no
concello da Coruña ás persoas que compartan os seus obxectivos de
encher redes, servizos, ferramentas e programas con contidos na nosa
lingua. O colectivo celebra este sábado a súa primeira xuntanza, no
Centro Ágora ás 17.00 horas.
Segundo
avanza a propia comunidade, trátase dun “espazo aberto, plural, de
balde”, dirixido a persoas que queiran compartir experiencias e
aprender de maneira colaborativa a xerar textos, vídeos, fotos,
código ou calquera outro tipo de material, con independencia da súa
idade, profesión ou nivel de coñecementos. Malia que non se pecha
en exclusiva aos contidos dixitais, a plataforma arrinca con forza
dando acubillo principalmente a blogueiras/os, youtubeiras/os e
instagramers. Porén, terá cabida calquera persoa creadora de
material en galego procedente doutros ámbitos.
A
comunidade conta coa colaboración de Coruña Dixital, que vai apoiar
a súa primeira cita deste sábado. A partir desta finde,
está prevista a organización de xuntanzas mensuais na cidade para
ir facendo medrar o colectivo.