En marcha Mercarianxo.gal, o portal de venda online do comercio rianxeiro
xoves, 26 de novembro do 2020
A
Asociación de Empresarios de Rianxo informou de que xa está en
marcha o portal de comercio electrónico do tecido empresarial
rianxeiro: a plataforma de venda en liña Mercarianxo.gal,
posta en marcha en colaboración coa Xunta, a Deputación da Coruña
e máis o Concello. Segundo
indicaron a ARE e máis o Goberno local, a plataforma dará acubillo
e servizo a calquera establecemento con sede fiscal no municipio,
achegándose como un recurso extra para avanzar na transformación
das empresas cara a nova realidade (unha realidade con presenza cada
vez maior das novas ferramentas comerciais) e, tamén, para achandar
o terreo da recuperación e a revitalización no actual contexto de
crise sanitaria e económica. As persoas usuarias do portal poderán
mercar nas distintas tendas que operen na plataforma e solicitar o
envío ao domicilio de seu ou ben optar por recoller o pedido no
establecemento.
Mercarianxo.gal
salienta por achegar catro importantes vantaxes para os
establecementos: presenta menor gasto que unha web propia (a ARE e os
técnicos encárganse do mantemento), inclúe asesoramento e axuda
personalizada, constitúese como unha canle de venda adicional e
permite ter abertas as portas (virtuais) dun establecemento os 365
días do ano.
A
plataforma presentouse nos seus detalles o pasado mes de setembro,
nun acto no que se fixo fincapé nos seus dous piares fundamentais:
por unha banda a súa vertente de “gran escaparate virtual” e,
pola outra, o servizo de marketplace que pon a disposición
dos establecementos e clientes.
O
escaparate virtual vai permitir que tódolos negocios de Rianxo
estean localizados nun mesmo dominio a través do cal poidan amosar e
promover produtos e servizos, novidades, ofertas ou promocións
especiais, etc. “A finalidade deste escaparate virtual”,
sinalaron a ARE e máis o Concello, “é facilitar a localización
de empresas, produtos e/ou servizos por parte dos rianxeiros co
obxectivo de que busquen aquilo que precisan nos negocios da vila
antes de realizar as súas compras online ou fóra da vila”.
A
outra vertente da plataforma é un marketplace que permitirá
que aqueles comercios que o desexen poidan vender en liña os seus
produtos “aumentando así as súas opcións de negocio e as súas
ventas”. Nesta parte do proxecto terán cabida todo tipos de
comercios, incluso a alimentación, e tamén a hostalería. Ademais,
incluiranse os servizos de recollida de pedidos no propio
establecemento e a entrega no domicilio.