Empresas e particulares poderán presentar avais de maneira telemática
luns, 12 de novembro do 2018
Hoxe
a nosa terra deu un novo e importante paso en materia de
eAdministración, ou sexa, en materia de tecnoloxías postas ao
servizo das administracións públicas e, sobre todo, das súas
relacións coa cidadanía. O
avance en cuestión foi impulsado pola Consellería de Facenda e as
entidades financeiras ABANCA. BBVA e CaixaBank. Esta mañá as bancas asinaron un acordo con Facenda para incorporarse
ao proceso de presentación telemática de avais na Xunta de Galicia,
o que permitirá, en palabras do Goberno autonómico, “reducir
custos e axilizar a tramitación”.
O
convenio foi asinado en Santiago entre o conselleiro de Facenda,
Valeriano Martínez, e os representantes das tres entidades: o
director de Banca Institucional de ABANCA, Santiago Novoa; a
directora rexional Noroeste de BBVA, Asunción Álvarez; e a
directora da área de Institucións de CaixaBank en Galicia, María
Jesús García.
Segundo
explica Facenda, preténdese con esta alianza facilitar os trámites
de empresas e cidadáns, poñendo o foco na presentación de avais
perante a Administración autonómica (uns procesos que teñen unha
media de 2.000 ao ano). Os avais, para quen o saiba, son os elementos
que serven de garantía en contratacións públicas: un factor
imprescindíbel de seguridade e eficacia. Até o de agora, estes
procesos desenvolvíanse de xeito presencial na Caixa Xeral de
Depósitos, ben nos servizos centrais en Santiago de Compostela ou
ben nas delegacións territoriais da Xunta de Galicia (coa única
excepción dos avais outorgados polas sociedades de garantía
recíproca galegas, SOGARPO e AFIGAL). Co convenio asinado hoxe, a
Xunta estende esta posibilidade aos clientes de ABANCA, BBVA e
CaixaBank, que en conxunto representan máis do 40% dos avais
presentados na Administración galega.