Ecuador afianza a colaboración con Tecalis cunha segunda visita á súa sede
mércores, 29 de agosto do 2018
- Isidoro Martínez e Alberto Campos (Tecalis) co director do Instituto de Promoción de Exportacións e Investimentos do Goberno Ecuatoriano en Madrid
Representantes
do Goberno de Ecuador veñen de visitar novamente a sede de Tecalis,
empresa TIC galega radicada en Milladoiro (Ames), co fin de crear
sinerxías e colaboración arredor das novas ferramentas dixitais.
Segundo nos lembran dende Tecalis, trátase da segunda vez que
Ecuador acode ás dependencias da empresa tecnolóxica e, tamén, da
segunda vez que Tecalis é convidada (á súa vez) a visitar en datas
vindeiras o país latinoamericano para proseguir o labor de
cooperación.
A
xuntanza celebrada na sede da compañía no Parque Empresarial Novo
Milladoiro de Ames enmárcase na estratexia do Goberno ecuatoriano a
prol da dixitalización. Máis en detalle, o seu obxectivo é apostar
por diferentes sectores estratéxicos e establecer sinerxías
bidireccionais entre ambos os países, sobre todo arredor do
desenvolvemento de software e as tecnoloxías TIC, entre outras
cuestións e sempre buscando xeitos de potenciar a súa economía.
Entre
as empresas que están no seu punto de mira atópase Tecalis,
tecnolóxica galega referente en transformación dixital e
tecnoloxías disruptivas (amais de no desenvolvemento de servizos na
nube, deseño UX, consultoría tecnolóxica e proxectos TIC) factores
que segundo confirma a compañía galega están a ser moi buscados
por parte das autoridades ecuatorianas e os seus asesores
tecnolóxicos.
Tecalis
tamén recorda que participará o vindeiro mes de setembro no MWC
Américas 2018, que terá lugar en Los Ángeles (California), como
primeiro paso na súa expansión americana.