Diablo III chegará este ano a Nintendo Switch

xoves, 16 de agosto do 2018 Marcus Fernández

Dende Forbes publicaron accidentalmente un artigo (xa eliminado) no que confirmábase que Blizzard estaba a ultimar unha versión do xogo Diablo III para Nintendo Switch, que chegará ao mercado este mesmo ano como unha Eternal Collection que incluiría as expansións Reaper of Souls e Rise of the Necromancer que completaran o xogo que leva trunfando en diferentes plataformas dende 2012.
A versión para Nintendo Switch de Diablo III tamén incluirá algúns engadidos exclusivos, como unha armadura cosmética de Legend of Ganondorf, un marco de retrato de Tri-Forza, un polo mascota e unhas ás cosméticas de Echoes of the Mask.
O xogo poderá gozarse tanto en mobilidade como conectado ao televisor, e permitirá que até 4 usuarios xoguen xuntos nunha única Switch, que até 4 usuarios xoguen xuntos en 4 Switch diferentes comunicadas sen fíos (sen conexión á Rede) e tamén contará con modo cooperativo en liña (para o que será preciso o servizo de pagamento Nintendo Switch Online que verá a luz en setembro).
Este lanzamento para Switch non só é importante por incrementar as posibilidades de xogo da consola de moda¸ senón que tamén sería moi significativo, xa que sería o primeiro xogo de Blizzard para unha consola de Nintendo dende StarCraft 64 (xogo de Nintendo 64 que veu a luz en 2000).

Tráiler de Diablo III para Nintendo Switch

PUBLICIDADE