Darksiders III verá a luz en 2018

mércores, 3 de maio do 2017 Marcus Fernández

As reedicións dos primeiros xogos da franquía Darksiders por parte de THQ Nordic daba a entender que a compañía buscaba resucitar a saga, e finalmente anuncian xunto a Gunfire Games (estudio composto por múltiples tralladores de Vigil Games implicados nos xogos anteriores) que están a traballar en Darksiders III, xogo que verá a luz en 2018 para Xbox One, PlayStation 4 e PC, e que manterá as mecánicas dos anteriores pero estreando protagonista: Furia.
A maga Furia terá que perseguir e desfacerse das encarnacións físicas dos sete Pecados Capitais, para devolver o equilibrio ás forzas que asolan a Terra. O personaxe empregará maxia e o seu látego para enfrontarse a variados inimigos nun contorno de mundo aberto no que descubrir numerosos segredos segundo avanza a historia.
Para facilitar que os xogadores poidan achegarse sen medo a este terceiro episodio de Darksiders están a ofertase as entregas anteriores, de xeito que por 19,99 euros podemos mercar Darksiders: Fury’s Collection – War and Death para PlayStation 4 e Xbox One (o que correspondería a un desconto do 50%); mentres que en Steam as versións para PC están a prezos realmente ridículos: o primeiro xogo venderíase a 3,99 euros e o segundo a 5,99 euros.

Primeiro tráiler de Darksiders III

PUBLICIDADE