Unha aplicación galega para a xeolocalización avanzada de persoas e obxectos
luns, 9 de xullo do 2012
A firma galega Teixuapps, especializada no desenvolvemento de aplicacións móbiles
e plataformas tecnolóxicas de utilidade para a cidadanía, está a traballar nunha ferramenta
de xeolocalización móbil que permite dar conta, en tempo real, da situación de persoas
e obxectos que non queremos perder de vista no caso de aglomeracións.
Falamos de Findme3, un proxecto ideado especificamente
para proxenitores interesados en ter localizados aos seus fillos e fillas de
xeito doado, a fin de prever sustos non
desexados, por exemplo, en praias ou centros comerciais.
Porén, polas súas características, a ferramenta tamén
resulta de utilidade para ter localizadas mascotas, vehículos, ordenadores
portátiles, bolsos e todo tipo de obxectos de valor que poden resultar
atractivos para os amigos do alleo.
O sistema consiste nun dispositivo emisor dun sinal sen
fíos, baseado no protocolo de comunicación Bluetooth 4.0 de baixo consumo
enerxético que, polo seu reducido tamaño, pode ser aplicado como un parche para
a pel. O receptor deste sinal, pola súa banda, pode ser calquera smartphone que
teña instalada a aplicación.
Marco Duran, project
manager de Teixuapps, destaca a funcionalidade da ferramenta fronte a
outros dispositivos xa que, segundo afirma, “todo
o que existe no mercado neste sentido complementan dispositivos bastante caros
e de grandes dimensións, moi específicos para casos moi particulares, e máis
ben dirixidos a enfermos e persoas maiores”, engade.
Teixuapps será a firma responsable da realización do
proxecto, do desenvolvemento da aplicación e da posterior comercialización unha
vez rematada.
