Creada unha aplicación galega de balde para coñecer o grao de cumprimento da LOPD na nosa empresa
mércores, 9 de maio do 2012
A lexislación sobre Protección
de Datos (regulada mediante Lei Orgánica: LOPD) marca unha serie de límites á
utilización de datos persoais que lle afecta á inmensa maioría das empresas do
noso país, pero que só o 18% das mesmas a respecta como debería.
A empresa galega
Alcatraz, nun intento por aproveitar as vantaxes das novas tecnoloxías para o
cumprimento da LOPD por parte de empresas e autónomos (e evitar así as
consecuentes multas), vén
de crear a App Evalgest, unha aplicación en liña, de balde, que permite
determinar se calquera empresa ou profesional cumpre coa Lei Orgánica de
Protección de Datos e, en función das respostas, informarlle do grao de
cumprimento e a contía real coa que sería sancionada ou sancionado.
Máis polo miúdo, Evalgest
é un test que lle vai facendo unha serie de preguntas ao empresario ou
empresaria en relación aos datos almacenados na entidade que representa, tales
como teléfonos, currículums, datos sociais, económicos, financeiros ou de
seguros dos traballadores...
O resultado do test
obtense de inmediato, achegando a porcentaxe de incumprimento e a sanción que habería
que pagar en cada caso.
Segundo informan dende
esta entidade, calquera información que permita identificar a unha persoa
(nome, apelidos, DNI, teléfono, dirección física ou electrónica, matrícula do
coche, imaxe...) e que se recolla, por exemplo, mediante un formulario de alta
de usuario ou cliente, se grave nunha aplicación informática, se conserve
almacenada, se consulte, comunique ou permite o acceso a terceiras partes, xa
se considera tratamento de datos persoais, e “está suxeita ao cumprimento da Lei Orgánica de Protección de Datos
(LOPD)”.
Xa que logo, e en función de se dispón ou non dun sistema que garanta a
protección desa información, engaden que “a
broma pode saír por unha multa que vai dos 900 aos 600.000 euros”.