Conclúen con éxito os seminarios sobre informática xudicial que celebrou o CPETIG

luns, 3 de outubro do 2011 Raquel Noya

A pasada semana, o Colexio Profesional de Enxeñería Técnica en Informática de Galicia (CPETIG) organizou en Pontevedra e Ourense, senllos Seminarios sobre Informática Xudicial, Peritaxe Técnico e Proba Electrónica, aos que asistiron preto de medio cento de profesionais da materia tales como xuíces, maxistrados, secretarios xudiciais e fiscais...
Os seminarios tiñan como obxectivo informar e concienciar aos xuristas galegos dos avances acadados en materia probatoria nos casos en que interveña o factor informático no proceso, así como dos importantes beneficios que supón a incorporación e uso das novas tecnoloxías no propio proceso xudicial.
Asemade, con ámbolos dous ciclos formativos, que por certo foron financiados pola Secretaría Xeral de Modernización e Innovación Tecnolóxica, o CPETIG pretendía sensibilizar sobre a axuda que poden prestar os peritos informáticos nas causas xudiciais e as claves de valoración da proba informática.
O ciclo celebrado en Pontevedra tivo lugar no Hotel Galicia Palace e foi inaugurado polo subdirector xeral de Medios da Administración de Xustiza da Consellería de Presidencia, Administracions Públicas e Xustiza, Rafael Isaac Juanatey Mayán; e no caso de Ourense, que se celebrou no Hotel San Martín, a inauguración correu a cargo do subdirector xeral de Calidade, Interoperabilidade e Seguridade da Secretaría Xeral de Modernización e Innovación Tecnolóxica, Jaime Barros Leboreiros.

PUBLICIDADE