Coin, unha solución para non ter que cargar con múltiples tarxetas con banda magnética

Cada vez estamos máis afeitos a ver como en poucas horas un proxecto que busca financiamento abrindo a posibilidade facer pedidos anticipados acada o seu éxito, garantindo a súa viabilidade, e o que vén de conseguir tal en só 40 minutos é Coin, unha solución que consiste nunha dispositivo con forma de tarxeta bancaria que é capaz de almacenar no seu interior a información da banda magnética de ata 8 tarxetas (bancarias, de fidelidade, de socio...), para poder emulalas sen ter que cargar con elas.
Este produto consegue así solucionar xa un problema que espérase que no futuro poidan superar os teléfonos móbiles con tecnoloxías como o NFC, pero o seu prezo non resulta económico, xa que preténdese que saia á venda no verán de 2014 a un prezo de 100 dólares, aínda que os que fagan a reserva do produto poderán beneficiarse dun prezo promocional de 50 dólares (que parece ser reclamo suficiente como para xuntar un milleiro de pedidos en 40 minutos).
Para operar cunha tarxeta Coin será preciso facer uso dun lector de bandas magnéticas que pode conectarse directamente a un smartphone, que a través dunha aplicación transmitirá a información á tarxeta. Logo, o dispositivo ten un botón que permite conmutar entre as distintas tarxetas que teña na súa memoria interna ata un total de 8, amosando un identificador das mesmas nunha pequena pantalla integrada. A aplicación para smartphones pode almacenar un número ilimitado de tarxetas, polo que o límite de 8 non debería ser un problema, xa que as tarxetas cargadas en Coin poden mudarse en calquera momento.
A comunicación entre Coin e o móbil faise a través de Bluetooth, tecnoloxía que tamén emprega para poder advertir se nalgún momento a tarxeta Coin se afasta varios metros do smartphone (aproveitando as vantaxes do Bluetooth 4.0 LE) o que permítenos evitar perder o prezado dispositivo multi-tarxetas (que, por seguridade, pode configurarse para unha desactivación automática de transcorrer certo tempo dende a última toma de contacto co móbil).
Esta curiosa solución resulta moi atractiva no mercado estadounidense, onde a banda magnética aínda se emprega maioritariamente nas tarxetas bancarias, pero en Europa resulta practicamente inútil na súa presentación actual (e máis se temos en conta que tardará varios meses en ver a luz) de aí que os seus responsables aseguren que futuras versións podería integrar os chips presentes nas nosas tarxetas bancarias.

Vídeo promocional de Coin