Cine ao alcance de todos co proxector SIM2, DominoD60
mércores, 5 de novembro do 2008
SIM2, a
prestixiosa firma italiana que fabrica os máis avanzados sistemas de proxección
de vídeo, vén de presentar, para alegría dos grandes afeccionados ás pombas de
millo torradas na casa, o novo proxector Domino D60, que ofrece proxeccións de
calidade profesional sen ter que movernos do calor do noso fogar (que sobre
todo nestas datas sempre é de agradecer).
O novo D60 caracterízase por ofrecer unha
resolución de imaxes de 1080 p, a un prezo moi competitivo, o que o convirte
nunha das opcións máis “potentes do
momento” para os afeccionados ao cine dende a casa que desexen entrar no
mundo do High End A/V sen ter que
deixar por elo un ril como fianza.
Fiel á súa tradición de innovación e procura de
calidade, o fabricante italiano SIM2 presenta o D60 co obxectivo de achegarlle
“a calquera peto” a mellor definición
de imaxe cun manexo doado e con total compatibilidade cun amplo abano de imaxe,
relacións de aspecto (modo píxel a píxel e anamórfico incluídos) e formatos de
conexión (Vídeo-Composto, S-Vídeo, Compoñentes de Vídeo, RGBHV e HDMI).
Este dispositivo inclúe, asemade, a sofisticada
matriz DMD DarkChip 3 de 0´95” da
estadounidense Texas Instruments que, unida a unha lámpada de proxección de 200
vatios, permite explotar plenamente as posibilidades da “Full HD” a partires do
sistema de creación de imaxes DLP.
A última creación de SIM2 tamén incorpora o
novidoso sistema Dual Iris, que serve
tanto para mellorar o contraste como os detalles das esceas con pouca luz. En
concreto, este iris variable está interconectado a tres modos de visionado
prefixados: Cinema, Dynamic, e Standard.
Asemade, o novidoso circuito DynamicBlack de Texas Instruments
examina dixitalmente a fonte de vídeo e modula a apertura do iris baseándose no
nivel de luz presente na pantalla.
Outro dos puntos fortes do Domino D60 é a súa
facilidade de configuración e instalación, destacando o sistema de
desprazamento motorizado do bloque óptico no plano vertical (+60%/-40%).
Este dispositivo está dispoñible no mercado a un
prezo de 3.990 euros.