Chuza! incorpora servizo de xeolocalización de usuarios e novas

xoves, 30 de agosto do 2007 Fernando Sarasketa

Os usuarios e as novas de Chuza! xa están un pouquiño mellor situados no mapa da nosa terra (os primeiros, xeralmente) e no do mundo (as segundas), grazás á ferramenta de xeolocalización que o servizo galego vén de incorporar estes días. En virtude disto, os membros da comunidade xa poden ver na parte inferior da pantalla dos seus perfiles un mapa en miniatura e máis un formulario, co obxectivo de achegar ós demais usuarios da web información en datos persoais sobre onde se atopan exactamente e dende onde desenvolven o seu traballo chuceiro. Isto polo que respecta á figura dos usuarios.
No caso das novas, os datos de xeolocalización poden ser subministrados cada vez que se envía unha información, accedendo ó seu miolo, onde aparece un sistema de mapa e formulario. Cando o lector acuda a unha desas novas poderá vela acompañada do lugar exacto no que “abrollou”. Cómpre sinalar que a cuestión de ligar datos co espazo que os orixina está a achegar interesantes iniciativas na Rede galega, como por exemplo o mapa da Revolta Irmandiña de Xabier Feixoo ou o servizo Hipoqih, con sede e orixe na Coruña.

PUBLICIDADE