Chega Galejobs para mellorar dende a Rede a situación laboral da nosa terra
luns, 7 de setembro do 2015
Este verán chegou á
nosa Rede un novo servizo que en boa medida xa nos tardaba. Falamos
de Galejobs, un portal galego
posto en marcha para persoas residentes na nosa terra que se atopan
arestora procurando un posto de traballo e ás que lles interesa
acadalo o máis preto posíbel do seu fogar. O servizo, todo el
achegado na nosa lingua, foi posto en marcha por un equipo de
profesionais procedentes dos eidos financeiro, comercial e das
relacións públicas, xurdiu
coa arela de cubrir coa súa actividade toda a contorna xeográfica
galega, non só a das grandes cidades.
Segundo informan os seus
responsábeis, o proceso de busca de emprego e a alta do noso perfil
profesional son de balde. Este mes de setembro, logo das boas
expectativas de agosto (os case 8.000 seareiros de Facebook a día 7
de setembro), o portal abre fogo co sorteo #AxudaGalejobs,
no que podemos gañar o curso en liña acubillado no portal que máis
nos interese. O único que temos que facer é achegar un gústame na
páxina de Galejobs en Facebook e logo crear o noso perfil
profesional no servizo.
Volvendo a Galejobs e os
motivos que xeraron a súa posta en marcha, sinalar que unha das
finalidades da iniciativa é “mellorar a situación laboral da nosa
terra, potenciándoa como unha comunidade produtora e xeradora de
riqueza”. Con este obxectivo, os impulsores do portal xa deron o
coñecer o seu compromiso firme de potenciar o emprego e comercio
galego, “na crenza firme de que unha rede de consumo entre as
empresas de Galicia fomentará a mellora económica da nosa
comunidade”. Ao seu xuízo, rebordamos talento profesional e
empresarial nunha manchea de ámbitos de actividade, polo que era
imprescindíbel pór en marcha medidas que, coma esta, contribuíran
a canalizalo.
Os creadores do portal
tamén sinalan que entre as súas arelas atópase a de seren un
referente galego en materia de consultoría de recursos humanos e
formación, “adiantándonos á tendencias do mercado e ofrecendo un
produto de calidade”.
Arestora, no apartado de
ofertas, o servizo fornece xa preto de 80 entradas pertencentes aos
máis variados ámbitos laborais (moitos deles ámbitos TIC) e
divididas nos seguintes tipos de contrato: formación, freelance,
indefinido, prácticas, substitución, temporal ou tempo parcial.