Capcom prepara versión móbil de Puzzle Fighter

xoves, 31 de agosto do 2017 Marcus Fernández

A mediados dos anos 90, en plena febre dos xogos de loita nos salóns recreativos, dende Capcom quixeron aproveitar o pulo de Street Fighter II para estrear Super Puzzle Fighter II Turbo, un xogo no que presentan versións caracterizadas dos loitadores do xogo orixinal (xunto con algún de Darkstalkers) para enfrontalos, pero non mediante mecánicas de xogo de loita, senón competindo nun xogo de bloques descendentes na liña do célebre Columns de SEGA.
Este xogo foise adaptando a distintas plataformas ao longo do tempo (de xeito que incluso puidemos gozalo en Xbox 360 e PlayStation 3 nun remake que o adaptou á alta definición) e agora confirman que vai contar cunha versión totalmente nova, Puzzle Fighter, título que a finais de ano chegará a iOS e Android cunha aparencia modernizada. Poderá descargarse de balde e o seu lanzamento non será global, senón paulatino, para ir adaptando os servidores para que a súa funcionalidade de xogo en liña corra de xeito solvente.
Puzzle Fighter contará cun cadro de loitadores moi interesante, dos que están confirmados Ryu, Ken e Chun-Li (de Street Fighter), X (de Mega Man), Morrigan (de Darkstalkers) e Frank West (de Dead Rising) aos que sumaranse máis personaxes. O usuario elixirá un loitador principal e poderá escoller outros dous de axuda e, como vén a ser costume neste tipo de xogos competitivos, será doado xogar, pero terá a suficiente profundidade para poder resultar desafiante e altamente aditivo, podendo optarse tanto ao xogo para un xogador como a combates en tempo real que serán claramente o punto forte deste título que contará con moito contido desbloqueable (como era de esperar para unha aplicación que poderá descargarse de balde, pero integrará compras).

Vídeo de adianto de Puzzle Fighter

PUBLICIDADE