Canon presenta a súa nova cámara sen espello de entrada

mércores, 24 de maio do 2023 Marcus Fernández

Nos últimos anos puidemos ver como os grandes fabricantes de cámaras foron deixando paulatinamente de lado o mercado das réflex para centrarse nas cámaras sen espello e, moi especialmente con sensores de tamaño completo, pero para usuarios que están cómodos co tamaño de sensor APS-C tamén seguen a producir cámaras como a nova Canon EOS R100, que chegará ao mercado o 30 de xuño a un prezo recomendado de 739,99 euros cun obxectivo RF-S 18-45mm, converténdose na cámara de entrada deste segmento.
A Canon EOS R100 ten un sensor APS-C de 24,1 Mpíxeles con enfoque automático Dual Pixel CMOS AF, así como conectividade Bluetooth e Wi-Fi (para transferir as fotografías que tomemos ao móbil ou para tirar proveito do disparo remoto) e gravación de vídeo en 4K, de xeito que estamos ante unha cámara moderna que pode lembrarnos a cámaras clásicas da marca, que fai pequenos sacrificios para poder manter un prezo axustado.
Esta nova cámara ten un peso de só 356 gramos, emprega monturas RF (podendo empregarse obxectivos EF e EF-S mediante un adaptador), o seu visor electrónico OLED ten 2,36 Mpíxeles mentres que o seu monitor LCD presenta unha relación de 1,04 Mpíxeles, integra flash, e carece de entrada para micrófono externo (polo que os interesados en gravar vídeo probablemente prefiran facerse cunha EOS R50).

A Canon EOS R100 aproveita a conectividade sen fíos para transferir imaxes ao móbil

PUBLICIDADE