CPEIG e a AMTEGA pechan este domingo o programa TechKids cunha gran xornada de obradoiros
luns, 21 de outubro do 2019
O
programa TechKids, posto en marcha polo CPEIG e AMTEGA para facer
agromar na rapazada galega a semente das vocacións tecnolóxicas,
está a piques de dar a súa nota máis alta, logo dunha xira que
achegou obradoiros e actividades diversas en todos os recantos da
nosa xeografía. Será
este domingo 27 de outubro, na Cidade da Cultura: o día e o
emprazamento elixidos para a xornada final da convocatoria actual do
programa. A cita constituirá o broche de ouro dos obradoiros de
programación, de robótica, de drons e de animación 3D
desenvolvidos estes meses pasados nunha manchea de concellos. O
evento celebrarase de 11:00 a 14:30 horas no Edificio do Centro de
Innovación Cultural (CINC) da Cidade da Cultura de Galicia (Monte
Gaiás s/n) en Santiago de Compostela.
A
actividade, enmarcada en DigiTalent, está destinada a “estimular o
talento precoz no ámbito das Tecnoloxías da Información e
Comunicacións, as TIC, así como fomentar o atractivo vocacional de
profesións científico-tecnolóxicas entre a poboación máis nova”,
en palabras do Colexio Profesional de Enxeñaría en Informática de
Galicia e a Axencia para a Modernización Tecnolóxica de Galicia. En
concreto, a organización ten prevista a participación de
aproximadamente un centenar rapaces e rapazas de 10 a 17 anos nunha
xincana tecnolóxica con seis obradoiros diferentes.
Un
dos obradoiros, Tech escape room, está deseñado para rapaces
de 10 a 15 anos. Segundo informan as dúas entidades devanditas, o
taller baséase nun deseño orixinal, coas mulleres como
protagonistas e uns obxectivos claros: fomentar o goce pola
aprendizaxe e o rendemento académico, a motivación do público
participante e desenvolver competencias relativas á capacidade de
liderado, traballo en equipo e capacidade crítica. “Nesta
actividade, os participantes farán uso de contidos matemáticos para
crear enigmas, xogos e crebacabezas que necesitarán resolver para
poder escapar da sala na que estarán pechados”, informa o CPEIG.
Outra
das actividades centrarase no mundo dos drons. Os rapaces, de 13 a 17
anos, que participen no obradoiro de Drones Leo Racing gozarán
da experiencia de pilotar vehículos áreos non tripulados e
aprenderán diferentes aspectos técnicos de maneira lúdica e
activa. Para iso, a actividade comezará cunha sesión formativa
sobre normas básicas e técnicas de voo, que poderán ser
experimentadas de primeira man nunha zona de probas. Logo farase unha
demostración dun circuíto de obstáculos con zonas LED.
Ademais,
os rapaces e rapazas de 10 a 14 anos poderán participar na
actividade Microbit Experience, onde poderán facer divertidos
programas para crear emojis en movemento, enviar mensaxes
secretas entre as microbils, amais de programar varios xogos,
como o de fronte ou cruz ou a realizar un dado electrónico.
Microbit, para quen non o saiba, é un computador programábel de
pequeno tamaño e con detección de movemento, un compás incorporado
e tecnoloxía Bluetooth creado para a educación. Conta coa súa
propia contorna de programación gráfica, un editor de bloques de
JavaScrip, pero tamén se pode programar con outras linguaxes que
permiten un nivel máis avanzado.
Amais
do devandito, a organización tamén incluíu o obradoiro de Leap
Motion, un sensor de movemento que permite controlar o computador
mediante xestos que se realizan no aire. O obxectivo é permitir que
os máis pequenos “debuxen no aire, movan estruturas ou constrúan
coas súas mans, todo reflectido nun videoxogo”. Por exemplo, o
xogo permite mover as mans coma se se estivese a dar a volta á bóla
do mundo e navegar así por Google Maps.
Por
outra banda, tamén haberá unha actividade sobre Electric Paint,
un xogo que permite experimentar con pintura condutiva que funciona
sobre unha manchea de superficies como roupa, móbeis, paredes, teas,
etc. “Estas pinturas á auga”, informa o CPEIG, “posúen a
propiedade de conducir a electricidade e son axeitadas para crear
circuítos brandos e fabricar sensores, por estes e outros motivos
trátrase dunha actividade ideal para iniciarnos na electrónica e a
programación, ao mesmo tempo que axuda aos rapaces a poñer en
práctica os coñecementos artísticos”.
Na
xornada tamén terá cabida o cinema. Así, os pequenos de todas as
idades poderán participar no obradoiro A maxia do cine, no
que se lles aprenderá a converterse en actrices e actores, en
protagonistas da súa propia aprendizaxe facendo aparicións nas súas
películas favoritas.
De
maneira simultánea, celebrarase de 12 a 14 horas dúas conferencias
sobre o mundo dos videoxogos e a animación do director e fundador do
Congreso Internacional de Animación, Efectos Especiais e Novos Media
Mundos Digitales, Manuel Meijide, e o co-fundador da produtora
audiovisual Illusorium Studios (recoñecido
estudio de postprodución nacional especializado en 3D), Raúl Rocha.
Durante esta sesión de traballo, o devandito festival presentará en
primicia a nova rede social de Facebook, baseada en Realidade Virtual
e con escenarios recreados pola compañía española Illusorium
Studios. Raúl Rocha fará a presentación e repasará os fitos e
oportunidades dun proxecto destas características.
Ademais,
Meijide impartirá una conferencia na que exporá as posibilidades
profesionais que o sector da creación dixital está a demandar,
centrándose sobre todo na animación e os videoxogos. “O sector
dos contidos dixitais atópase nun momento moi doce, no que se
requiren profesionais cualificados, por iso debemos orientar á
mocidade cara este sector enriquecedor, que engloba creatividade e
tecnoloxía, e á vez tan prometedor de cara ao futuro”, explica
Meijide.
As
inscricións na xornada poden facerse vía web.