Bota o peche a publicación de videoxogos de máis antigüidade
venres, 30 de maio do 2014
Nos últimos anos non son poucas as publicacións dedicadas ao
mundo dos videoxogos das que demos conta do cesamento das súas edicións, en boa
medida por ser un dos sectores nos que os lectores máis rapidamente deron o
salto aos soportes dixitais de lectura, pero agora dende MCV están a dar conta
do que sería o peche da revista de videoxogos máis antiga do mundo, xa que a editorial
Future estaría a padecer unha reestruturación froito das perdas acumuladas que saldaranse
co despedimento de 170 traballadores no Reino Unido e co peche da histórica
CVG (Computer & Video Games),
revista que nacera en novembro de 1981 baixo o lema de “a primeira revista divertida
de informática”. Future tamén pretende pechar Edge Online e as páxinas web das
revistas oficiais de PlayStation, Xbox e Nintendo.
Cómpre destacar que a revista CVG xa cesara de imprimir a súa edición en papel
en 2004, converténdose nun medio puramente dixital, medio no que Future non
parece ter atinado, pois curiosamente botará o peche da edición dixital de Edge
mentres continúa a publicarse en papel, deixando claro que o negocio na
Internet desta compañía non conseguiu manter a súa sustentabilidade, mentres
que na Rede teñen bastante pulo medios que non naceran nos quioscos.
- No Internet Archive podemos consultar versións dixitalizadas dos primeiros números da revista CVG