BOOX presenta un novo lector de libros electronicos con Android

Para os amantes dos lectores de libros electrónicos máis tradicionais chega unha curiosa alternativa, o lector BOOX Go 6, que estará dispoñible a partir do 19 de setembro a un prezo de 169,99 euros, e que destaca por poder correr aplicacións para Android.
Este curioso lector de libros electrónicos ten unha pantalla E Ink Carta 1300, que presenta unhas imaxes nítidas grazas á súa resolución de 300 puntos por polgada, ten un grosor de só 6,8 milímetros e só pesa 146 gramos, polo que resulta moi cómodo para sesións de lectura prolongada, que non ten que limitarse a documentos nun dos 26 formatos de documentos que soporta (e que incluso poden cargarse a través de tarxetas microSD), senón que tamén pode tirarse proveito de contidos achegados a través de aplicacións para Android como Flipboard ou Pocket, así como diarios en liña, aínda que tamén haberá quen aproveite as funcionalidades do dispositivo para escoitar podcasts.
O BOOX Go 6 funciona cun procesador de 8 núcleos a 2 GHz, ten 2 GB de RAM e 32 GB de almacenamento interno, a súa pantalla monocromo ten iluminación frontal axustable, a súa batería de 1.500 mAh promete unha longa autonomía e, pese a estarmos ante un produto novo, funcionará con Android 12, o que permite un uso máis amplo que o dun simple lector de libros electrónicos.
Para os interesados neste tipo de produtos BOOX tamén lanzou recentemente un lector con pantalla de 10,3 polgadas e outro cunha pantalla a cor de 7 polgadas, aínda que son lectores nun rango de prezos moi diferente.