As redes para procurar traballo, ao detalle na Feira de Emprego da Cámara de Comercio
luns, 25 de marzo do 2019
A
mocidade que queira formarse en ferramentas e metodoloxías que
axuden a atopar traballo, van ter oportunidade de facelo na cuarta
edición da Feira de
Emprego da Cámara de Comercio, que se celebrará o vindeiro 4 de
abril en Carballo. Será unha cita cos novos xeitos de promover as
nosas capacidades, coas redes sociais e o seu potencial curricular e
cos recursos que nos axuden a deixar a mellor pegada nunha entrevista
laboral. A
xuntanza celebrarase no Fórum Carballo e contará coa presenza de
expertos en empregabilidade, xestión de emocións e autoemprego,
entre outras áreas.
Segundo
informa a Concello, o programa da feira “está deseñado para que a
mocidade participante que nin estuda nin traballa atope no evento
unha oportunidade laboral”. Para este fin, o formato do encontro
será, en boa medida, de encontros abertos entre demandantes de
traballo e empresas e entidades potencialmente contratadoras. A idea
é non limitarse a recoller currículos, senón a que haxa
entrevistas directas coas e cos candidatos.
A
apertura da feira (sobre as 10.00) correrá a cargo do presidente e
do director da Cámara de Comercio, Antonio Couceiro e Gonzalo Ortiz,
respectivamente, nun acto ao que asistirá o alcalde de Carballo,
Evencio Ferrero. Logo, ás 11.00 horas, comezarán as conferencias,
que tratarán asuntos como a elaboración de currículos (a cargo de
Inmaculada Rodríguez, directora de Emocciación), a motivación e a
autoestima (Eva García) ou o emprego de redes sociais para os
procesos de procura de emprego (a cargo de Noemí Belas, directora da
nova firma Líbolis, pequenos emprendedores).
Pola
súa banda, Luís García e Rafael Vázquez, da Fundación Ronsel,
explicarán as claves para montar unha empresa, e o director da
Oficina de Emprego de Carballo da Xunta, Benigno Lubián, pechará o
programa cunha radiografía do mercado de traballo na comarca de
Bergantiños.