As industrias creativas debaten na Coruña sobre o impacto da IA

A irrupción das intelixencias artificiais xenerativas e os grandes modelos de linguaxe están a ter un impacto moi importante nas profesións gráficas e creativas, achegando tanto grandes vantaxes para a produción como unha ameaza para o emprego e a creación, de aí que Coruña Gráfica decidise organizar unha mesa de debate baixo o título IAs versus Industrias Creativas na que analizarán a implementación das IA no mercado e o seu impacto nos sectores creativos.
Esta actividade de entrada libre desenvolverase o vindeiro xoves a partir das 19:30 na sede da Asociación de Emprendedores de Galicia (ASCEGA) na rúa Antón Vilar Ponte,11 da Coruña. Participarán no debate Xavier Alcalá (enxeñeiro de Telecomunicacións e escritor), Santy Gutiérrez (ilustrador e humorista gráfico) e Tomás Conde (de Algarabía Animación), conducidos por Manel Cráneo (ilustrador e director de Demo Editorial).